Университетнинг “Лочин” волейбол жамоаси олий лигада иштирок этишни режалаштирмоқда
Қарши давлат университетининг “Лочин” талаба йигитлар волейбол жамоаси жорий йилда волейбол бўйича Ўзбекистон чемпионатида иштирок этиши борасида дастлабки келишувга эришилди. Бу ҳақда бугун Қарши давлат университетига ташриф буюрган Ички ишлар вазири ўринбосари, генерал-маёр Бекмурод Тожимирзаевич Абдуллаев билан учрашувда сўз борди. Айни кунда олийгоҳнинг спорт фаолияти: волейбол йўналишида 30 нафар талабалар таҳсил олади. Шунингдек, 14 нафар иқтидорли ёшлар “Лочин” волейбол жамоаси таркибида машғулот олиб бормоқда. Б.Абдуллаев билан мулоқотда Ўзбекистон волейбол федерацияси томонидан жамоанинг йиғинларга тайёргарлик кўриши, мураббийлар малакасини ошириш борасида амалий кўмак берилиши маълум қилинди. Барча жараёнлардан сўнг “Лочин” жамоаси олий лига чемпионатида иштирок этиши учун мурожаат билан чиқиши ва шу аснода рухсат берилишига келишиб олинди. Маълумот учун, айни вақтда Ички ишлар вазири, генерал-лейтенант Пўлат Бобожонов Ўзбекистон волейбол федерацияси раиси ҳисобланади.