Ёш жамоанинг муваффақиятли парвози: “Лочин” финалга йўл олди!

Жорий йилнинг 22-30 апрель кунлари Фарғона вилояти Фарғона шаҳрида жойлашган “Само” спорт мажмуасида волейбол бўйича Ўзбекистон чемпионатининг иккинчи тур учрашувлари бўлиб ўтди. Мазкур чемпионатда Қарши давлат университетининг “Лочин” волейбол жамоаси муваффақиятли иштирок этиб, якуний — учинчи тур финал босқичига йўлланма қўлга киритди. Жамоамиз умумий ҳисобда 7 та учрашув ўтказиб, шуларнинг 5 тасида ғалаба қозонди ва 2 бор мағлубиятга учради. Натижада, 16 очко жамғарган “Лочин” жамоаси финал босқичига йўл олди. Ўзбекистон чемпионатининг якуний босқичида мамлакатнинг 8 та кучли жамоаси ғолиблик учун кураш олиб боради. Эътиборлиси шундаки, Қарши давлат университети жамоаси ушбу чемпионатда илк бор иштирок этаётганига қарамасдан, ёш ва иқтидорли таркиби билан тажрибали жамоаларнинг эътирофига сазовор бўлмоқда. Эслатиб ўтамиз, чемпионатнинг биринчи тури жорий йилнинг февраль ойида Тошкент шаҳрида бўлиб ўтган эди. Ўша босқичда ҳам “Лочин” жамоаси муносиб иштирок этиб, иккинчи турга йўл олганди.