Qarshi davlat universitetida “Geografiya maydoni” ochildi

Qarshi davlat universitetida yangidan bunyod etilgan “Geografiya maydoni” oʻquv-amaliyot markazi foydalanishga topshirildi. Ushbu maydonchada astronomik, meteorologik, gidrologik, geologik, topografik va kartografik burchaklar tashkil etilib, 40 ga yaqin oʻquv qurollari oʻrnatildi. Eng oddiy gnomondan tortib, zamonaviy “Sokol” apparatigacha boʻlgan vositalar talabalarga geografik bilim va koʻnikmalarni amaliyotda mustahkamlash imkonini beradi. Ochilish marosimida so‘z olganlar bu imkoniyatlar yoshlar uchun yaratilayotgan shart-sharoitlar, sifatli ta’lim va ilm-fanga berilayotgan e’tiborning amaldagi ifodasi ekanini ta’kidladilar. Geografiya maydonchasida olib boriladigan kuzatish va amaliy mashg‘ulotlar talabalarning ilmiy dunyoqarashini kengaytirib, o‘z hududining iqlimi hamda iqtisodiyoti haqida chuqurroq tasavvur hosil qilishiga xizmat qiladi.