“VATAN UCHUN, MILLAT UCHUN, XALQ UCHUN!”
Qadrli hamkasblar, aziz talabalar!
Har bir millat, mamlakat taraqqqiyotining eng muhim va bosh omili – shubhasiz mustaqillikdir. Haqiqatan, hurlik shabadalari ko‘kragiga urib turgan, erkinlik nafasini butun vujudi bilan tuygan xalq har tomonlama yuksaladi. Ana shu hurlik ne’mati o‘zbek xalqi hayotini tubdan yangiladi, o‘z taqdirini o‘zi hal eta olish imkonini berdi, jahon hamjamiyatida munosib o‘rin egallashdek sharafli tuhfani in’om etti, milliy davlatchiligimizni, azaliy qadriyat va urf-odatlarimizni, muqaddas dinimizni, inson huquq va erkinliklarini qayta tiklashdek baxtni tortiq qildi. Muhtaram yurtboshimiz “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qarorida haqli e’tirof qilganidek, “Dunyodagi har bir davlatning milliy suvereniteti va mustaqilligi shu mamlakatning xalqaro huquq subyekti sifatida jahon hamjamiyatidan munosib o‘rin egallashi, o‘z xalqining tinch va farovon hayotini, uning eng muhim manfaatlarini ta’minlashga xizmat qiladigan mustahkam siyosiy-ijtimoiy zamin va kuch-qudrat manbaidir”.
Bugungi qutlug‘ lahzalarda butun universitet jamoasini eng ulug‘ va eng aziz bayram – Mustaqillik kuni bilan chin qalbimdan samimiy tabriklashdan qalbimda yuksak faxr-iftixor tuyaman.
Yurtimizda istiqlol tantanalarini har yili o‘zgacha ruh va shukuh bilan qarshi olinadi. Joriy yilda mustaqillikning 34 yilligiga bag‘ishlangan bayram tadbirlari “Vatan uchun, millat uchun, xalq uchun!” degan ezgu g‘oyasi ostida o‘tkazilishi barcha yurtdoshlarimiz qatori universitet jamoasini ham behad quvontiradi. Qolaversa, mazkur g‘oya ostida “Ona diyor – ranglar jilosida”, “Vatan uchun yashaylik!”, “Eng ulug‘, eng aziz” kabi an’anaviy ko‘rik-tanlovlarning ham tashkil etilishi qalbida vatanga muhabbat hissi bilan yashayotgan ko‘pmillatli xalqimiz, ayniqsa, yoshlarimizni yanada ko‘tarinki kayfiyat bilan bayramni qarshi olishlariga zamin yaratdi.
Uchinchi Renessans sari ildam odimlayotgan mamlakatimiz har bir qadamda ertangi kun egalari – yosh avlod tarbiyasiga alohida e’tibor qaratmoqda. Yuqorida tilga olingan ko‘rik-tanlovlar va boshqa bajarilayotgan amaliy ishlar bunga misoldir. Prezidentimiz Shavkat Mirziyoyev rahbarligida O‘zbekistonda Uchinchi Renessans poydevorini barpo etish uchun yangi Xorazmiylar, Beruniylar, Ibn Sinolar, Ulug‘beklar, Navoiy va Boburlarni tarbiyalab beradigan muhit va sharoitlarni yaratishga katta e’tibor qaratilayotgani butun xalqimiz, ayniqsa, biz kabi ta’lim sohasi vakillari qalbini g‘urur, iftixor va sharafga to‘ldirmoqda.
Shuni mamnuniyat bilan ayta olamanki, yildan yilga universitetimiz jamoasi tomonidan e’tirof etishga arzirli yutuqlar, muvaffaqiyatlar ko‘paymoqda. Albatta, jamoamizning bunday yutuqlarni qo‘lga kiritishida har tomonlama qulay shart-sharoitlar yaratilganligi katta ahamiyatga ega. Bugun universitetimiz qiyofasi jahon standartlariga mos ravishda tamomila yangilandi. Oliygohimizning tashqi qiyofasiga nazar tashlagan har qanday insonning qalbida shu dargohda ta’lim berish va olish orzusi jo‘sh urmoqda. Jumladan, joriy yilda jahon standartlari talablariga to‘la javob beradigan, katta moddiy-texnikaviy bazaga ega 1000 o‘rinli ko‘rkam Xorijiy tillar fakulteti o‘quv binosining foydalanishga topshirilgani so‘zimizga yaqqol dalildir. Zamonaviy arxitekturaga ega, 5 qavatli yangi o‘quv binoda “Institut Français de Karshi” fransuz tili, Ingliz tili dasturlari, Koica, Nemis tili, Rus tili va Xitoy tili markazlari, Erasmus+ dasturlari ofisi, Media studiya, Sinxron tarjima auditoriyasi, keng va qulay ma’ruzalar zallari, Tibbiy muolaja xonasi, Lingafon xonalari, kutubxona, eng so‘nggi axborot kommunikatsiya texnologiyalari bilan jihozlangan kompyuter xonalari mavjud. O‘quv, laboratoriya xonalari interaktiv doskalar, zamonaviy o‘quv jihozlari bilan ta’minlangani ko‘pchilikning e’tirofiga sazovor bo‘ldi.
Universitetning qiyofasiga mos ravishda ta’limda ham yangi muvaffaqiyatlar qozonilmoqda. Dargohimizda tahsil olayotgan talabalar, nafaqat, jahon standartlariga mos ravishda ta’lim olmoqdalar, balki Xalqaro qo‘shma ta’lim dasturlari asosida Qarshi davlat universiteti hamkorligida faoliyat olib borayotgan qator nufuzli xorijiy oliygohlarda ham o‘qishni davom ettirib, ta’lim dasturlarini muvaffaqiyatli yakunlamoqdalar. Xususan, joriy yilda Moskva davlat lingvistika universiteti Filologiya va tillarni o‘qitish: ingliz tili yo‘nalishi, Belgorod davlat milliy tadqiqot universiteti O‘zga tilli guruhlarda rus tili, Tasviriy san’at va muhandislik grafikasi yo‘nalishlari hamda Lingvistika: ingliz tili magistratura mutaxassisligi, N.A.Dobrolyubov nomidagi Nijegorod davlat lingvistika universiteti Lingvistika: rus tili va Lingvistika: ingliz tili magistratura mutaxassisliklari, Yanka Kupala nomidagi Grodno davlat universiteti Amaliy matematika yo‘nalishi bitiruvchilari diplomlarini qo‘lga kiritdilar.
Professor-o‘qituvchilarimiz tomonidan esa o‘nlab monografiya, risola, darslik va o‘quv qo‘llanmalarining nashr ettirilishi, mamlakatimiz hamda xorijning nufuzli ilmiy jurnallarida chop etilayotgan maqolalar ilmiy sohadagi yutuqlarimiz, pedagogik faoliyatimizning samarasi ekani barchamizni quvontiradi. Ishonchim komilki, yangi o‘quv yilda ham astoydil mehnat qilib, yetuk kadrlar tayyorlashdek mas’uliyatli vazifani ado etib, yanada ulkan marralarni egallaymiz. Buning uchun hamjihatlikda bor imkoniyalardan unumli foydalanamiz.
Shuni alohida ta’kidlash joizki, universitetda tahsil olayotgan iqtidorli, bilimli va zukko talaba-yoshlarni aniqlash, tarbiyalash, ularning fan olimpiadalarida munosib o‘rinlarni egallashini ta’minlash, Davlat stipendiyalari va mukofotlariga tavsiya qilish hamda yuksak natijalarga erishishlarida universitet rahbariyati Siz aziz ustozlar va ishchi-xodimlarning sharafli mehnatingizga ishonch bildiradi.
Qadrli hamkasblar!
Sizlarni yana bir bor go‘zal va betakror Vatanimiz mustaqilligining 34 yilligi hamda 2 sentabr – Bilimlar kuni munosabati bilan muborakbod etishdan baxtiyorman. Sizlarga oilaviy baxt, tinchlik-xotirjamlik, sixat-salomatlik, farovon hayot, ilmiy va murabbiylik faoliyatingizda ulkan zafarlar tilab qolaman!
Dilmurod NABIYEV, universitet rektori